北海道築地﹗直擊函館朝市即食海鮮

函館貴為北海道數一數二發達的港口，每日都會有大量新鮮漁獲運到函館朝市，識嚐鮮就當然要去這個海鮮聖地！函館朝市大致分為橫丁市場、駅二市場、函館朝市及協和會等四個區域，今次主要去駅二市場，等大家感受一下，日本市場除了多美食，還有許多樂趣！

函館潮釣魷魚攻略

函館朝市內有多達400家店鋪，除有新鮮的海鮮丼料理外，亦可以即席買海鮮讓店家烹調。其中位於駅二市場的「元祖活いか釣堀」非常特別，能讓客人體驗釣魷魚的滋味！釣魷魚的價錢每天不一，視乎當日魷魚的大小而定。付款後便可拿到釣桿，店家會先教授釣墨魚的方法，所以唔使擔心釣唔到！

釣起魷魚後，師傅會免費幫大家整成魷魚刺身拼盤，味道新鮮不在話下，能夠食到自己親手釣起的魷魚更添一份滿足感，同一班親朋戚友一齊釣就更加開心。不過要留意墨魚釣場的服務時間由上午5時半至下午1點半結束，所謂「早起的人們有魚吃」，晏咗去無得食又無得釣就喊都無謂喇！

食盡函館鮮味

咁大個市場，又點會只有墨魚食？當然不少得有毛蟹、海膽、扇貝等各式各樣的生猛海鮮，也可以請師傅烹調，即買即食，夠晒鮮美。不過這些新鮮海鮮只能在現場食，如果可以帶回香港你話幾好呢？其實駅二市場內都有大量海鮮加工品，大家就可以盡情揀選心水特產返屋企或者做手信啦！

在香港行街市，地下總是濕淋淋，或甚有不少垃圾，令人行得不太舒服。不過函館朝市完全沒有這個問題，即使售賣生蹦活跳的海鮮的店外，地下都是十分乾爽，加上地方夠寬敞，店員有活力又親切，實在使人行到樂而忘返呢！

• 函館朝市 駅二市場

• 北海道函館市若松町9-19

• 5月至10月 5:30am-2:00pm、11月至4月 6:00am-2:00pm（店舖各異，詳情參照官網）

• 1至6月及10、11月 第三個星期三定休，7至9月無休（個別店舖或會臨時休店）

• JR函館站徒步約2分鐘

• http://www.asaichi.ne.jp/ekini/

  本文由GO!Japan授權轉載。